ABŞ-nyň Döwlet departamenti Ukraina ERAM (Extended Range Attack Munition), uzaklygy giňeldilen uçar raketalarynyň ok-därilerini we degişli enjamlary, takmynan 825 million dollarlyk ýaragy satmak baradaky ylalaşygy tassyklady.
Bu maglumaty Pentagonyň Goranmak howpsuzlugy hyzmatdaşlygy gullugy (DSCA) çap etdi.
"Teklip edilýän satuw, hyzmatdaş döwletiň howpsuzlygyny ýokarlandyrmak, syýasy durnuklylygyň we Ýewropadaky ykdysady ösüşiň hereketlendirijisi bolmak bilen, ABŞ-nyň daşary syýasatyna we milli howpsuzlyk maksatlaryna ýardam eder" diýip, habarda bellenýär.
DSCA öňde duran geleşigiň sebitdäki esasy harby deňagramlylygy üýtgetmejekdigini aýtdy.
Agentlik eýýäm ähli zerur şahadatnamalary berdi we meýilleşdirilen satuw bilen Kongresi habardar etdi. Esasy potratçylar “Zone 5 Technologies” we “Aspire” diýlip atlandyryldy.
Çap edilen maglumatlara görä, Ukraina üç müňe çenli ok-däri sorady. Eltilip beriljek bukja konteýnerler, asma enjamlar, ätiýaçlyk şaýlary, programma üpjünçiligi, okuw materiallary, şeýle-de tehniki goldaw we logistika hyzmatlary girer.
Bu ylalaşyk Kiýewiň Ýewropadaky ýaranlary tarapyndan maliýeleşdirilýän 850 million dollarlyk harby kömek bukjasynyň bir bölegi bolar.
"The Wall Street Journalyň" çeşmelerine görä, ERAM-yň ilkinji partiýalarynyň alty hepdäniň içinde Ukrainanyň ýaragly güýçlerine gowşurylmagyna garaşylýar.
“Kommersantyň” maglumatyna görä, täze ERAM-lar “Storm Shadow / SCALP” ganatly raketalaryna arzan alternatiwa bolup biler.